Ṣoḍaśaḥ sargaḥ
Technical Details
ṣoḍaśaḥ sargaḥ
āryasatya
evaṃ manodhāraṇayā krameṇa vyapohya kiñcit samupohya kiñcit|
dhyānāni catvāryadhigamya yogī prāpnotyabhijñā niyamena pañca||1||
ṛddhipravekaṃ ca bahuprakāraṃ parasya cetaścaritāvabodham|
atītajanmasmaraṇaṃ ca dīrghaṃ divye viśuddhe śruticakṣuṣī ca||2||
ataḥ paraṃ tattvaparikṣaṇena mano dadhātyāsravasaṃkṣayāya|
tato hi duḥkhaprabhṛtīni samyak catvāri satyāni padānyavaiti||3||
bādhātmakaṃ duḥkhamidaṃ prasaktaṃ duḥkhasya hetuḥ prabhavātmako'yam|
duḥkhakṣayo niḥsaraṇātmako'yaṃ trāṇātmako'yaṃ praśamāya mārgaḥ||4||
ityāryasatyānyavabudhya buddhyā catvāri samyak pratividhya caiva|
sarvāsravān bhāvanayābhibhūya na jāyate śāntimavāpya bhūyaḥ||5||
abodhato hyaprativedhataśca tattvātmakasyāsya catuṣṭasya|
bhavād bhavaṃ yāti na śantimeti saṃsāradolāmadhiruhya lokaḥ||6||
tasmājjarādervyasanasya mūlaṃ samāsato duḥkhamavaihi janma|
sarvauṣadhīnāmiva bhūrbhavāya sarvāpadāṃ kṣetramidaṃ hi janma||7||
yajjanmarūpasya hi sendriyasya duḥkhasya tannaikavidhasya janma|
yaḥ saṃbhavaścāsya samucchrayasya mṛtyośca rogasya ca saṃbhavaḥ saḥ||8||
sadvāpyasadvā viṣamiśramannaṃ yathā vināśāya na dhāraṇāya|
loke tathā tiryaguparyadho vā duḥkhāya sarvaṃ na sukhāya janma||9||
jarādayo naikavidhāḥ prajānāṃ satyāṃ pravṛttau prabhavantyanarthāḥ|
pravātsu ghoreṣvapi māruteṣu na hyaprasūtāstaravaścalanti||10||
ākāśayoniḥ pavano yathā hi yathā śamīgarbhaśayo hutāśaḥ|
āpo yathāntarvasudhāśayāśca duḥkhaṃ tathā cittaśarīrayoniḥ||11||
apāṃ dravatvaṃ kaṭhinatvamurvyā vāyoścalatvaṃ dhruvamauṣṇyamagneḥ|
yathā svabhāvo hi tathā svabhāvo duḥkhaṃ śarīrasya ca cetasaśca||12||
kāye sati vyādhijarādi duḥkhaṃ kṣuttarṣavarṣoṣṇahimādi caiva|
rūpāśrite cetasi sānubandhe śokāratikrodhabhayādi duḥkham||13||
pratyakṣamālokya ca janmaduḥkhaṃ duḥkhaṃ tathātītamapīti viddhi|
yathā ca tadduḥkhamidaṃ ca duḥkhaṃ duḥkhaṃ tathānāgatamapyavehi||14||
bījasvabhāvo hi yatheha dṛṣṭo bhūto'pi bhavyo'pi tathānumeyaḥ|
pratyakṣataśca jvalano yathoṣṇo bhūto'pi bhavyo'pi tathoṣṇa eva||15||
tannāmarūpasya guṇānurūpaṃ yatraiva nirvṛttirudāravṛtta|
tatraiva duḥkhaṃ na hi tadvimuktaṃ duḥkhaṃ bhaviṣyatyabhavad bhaved vā||16||
pravṛttiduḥkhasya ca tasya loke tṛṣṇādayo doṣagaṇā nimittam|
naiveśvaro na prakṛtirnaṃ kālo nāpo svabhāvo na vidhiryadṛcchā||17||
jñātavyametena ca kāraṇena lokasya doṣebhya iti pravṛttiḥ|
yasmānmriyante sarajastamaskā na jāyate vītarajastamaskaḥ||18||
icchāviśeṣe sati tatra tatra yānāsanāderbhavati prayogaḥ|
yasmādatastarṣavaśāttathaiva janma prajānāmiti veditavyam||19||
sattvānyabhiṣvaṅgavaśāni dṛṣṭvā svajātiṣu prītiparāṇyatīva|
abhyāsayogādupapāditāni taireva doṣairiti tāni viddhi||20||
krodhapraharṣādibhirāśrayāṇāmutpadyate ceha yathā viśeṣaḥ|
tathaiva janmasvapi naikarūpo nirvartate kleśakṛto viśeṣaḥ||21||
doṣādhike janmani tīvradoṣa utpadyate rāgiṇi tīvrarāgaḥ|
mohādhike mohabalādhikaśca tadalpadoṣe ca tadalpadoṣaḥ||22||
phalaṃ hi yādṛk samavaiti sākṣāt tadāgamād bījamavaityatītam|
avetya bījaprakṛtiṃ ca sākṣādanāgataṃ tatphalamabhyupaiti||23||
doṣakṣayo jātiṣu yāsu yasya vairāgyatastāsu na jāyate saḥ|
doṣāśayastiṣṭhati yasya yatra tasyopapattirvivaśasya tatra||24||
tajjanmano naikavidhasya saumya tṛṣṇādayo hetava ityavetya|
tāṃśchindhi duḥkhād yadi nirmumukṣā kāryakṣayaḥ kāraṇasaṃkṣayāddhi||25||
duḥkhakṣayo hetuparikṣayācca śāntaṃ śivaṃ sākṣikuruṣva dharmaṃ|
tṛṣṇāvirāgaṃ layanaṃ nirodhaṃ sanātanaṃ trāṇamahāryamāryam||26||
yasminna jātirna jarā na mṛtyurna vyādhayo nāpriyasaṃprayogaḥ|
necchāvipanna priyaviprayogaḥ kṣemaṃ padaṃ naiṣṭhikamacyutaṃ tat||27||
dīpo yathā nirvṛtimabhyupeto naivāvaniṃ gacchati nāntarikṣam|
diśaṃ na kāṃcid vidiśaṃ na kāṃcit snehakṣayāt kevalameti śāntim||28||
evaṃ kṛtī nirvṛtimabhyupeto naivāvaniṃ gacchati nāntarikṣam|
diśaṃ na kāṃcid vidiśaṃ na kāṃcit kleśakṣayāt kevalameti śāntim||29||
asyābhyupāyo'dhigamāya mārgaḥ prajñātrikalpaḥ praśamadvikalpaḥ|
sa bhāvanīyo vidhivad budhena śīle śucau tripramukhe sthitena||30||
vākkarma samyak sahākāyakarma yathāvadājīvanayaśca śuddhaḥ|
idaṃ trayaṃ vṛttavidhau pravṛttaṃ śīlāśrayaṃ karmaparigrahāya||31||
satyeṣu duḥkhādiṣu dṛṣṭirāryā samyagvitarkaśca parākramaśca|
idaṃ trayaṃ jñānavidhau pravṛttaṃ prajñāśrayaṃ kleśaparikṣayāya||32||
nyāyena satyādhigamāya yuktā samyak smṛtiḥ samyagatho samādhiḥ|
idaṃ dvayaṃ yogavidhau pravṛttaṃ śamāśrayaṃ cittaparigrahāya||33||
kleśāṃkurānna pratanoti śīlaṃ bījāṅkurān kāla ivātivṛttaḥ|
śucau hi śīle puruṣasya doṣā manaḥ salajjā iva dharṣayanti||34||
kleśāṃstu viṣkambhayate samādhirvegānivādrirmahato nadīnām|
sthite samādhau hi na dharṣayanti doṣā bhujaṃgā iva mantrabaddhāḥ||35||
prajñā tvaśeṣeṇa nihanti doṣāṃstīradrumān prāvṛṣi nimnageva|
dagdhā yayā na prabhavanti doṣā vajrāgninevānusṛtena vṛkṣāḥ||36||
triskandhametaṃ pravigāhya mārgaṃ praspaṣṭamaṣṭāṅgamahāryamāryam|
duḥkhasya hetūn prajahāti doṣān prāpnoti cātyantaśivaṃ padaṃ tat||37||
asyopacāre dhṛtirārjavaṃ ca hrīrapramādaḥ praviviktatā ca|
alpecchatā tuṣṭirasaṃgatā ca lokapravṛttāvaratiḥ kṣamā ca||38||
yāthātmyato vindati yo hi duḥkhaṃ tasyodbhavaṃ tasya ca yo nirodham|
āryeṇa mārgeṇa sa śāntimeti kalyāṇamitraiḥ saha vartamānaḥ||39||
yo vyādhito vyādhimavaiti samyag vyādhernidānaṃ ca tadauṣadhaṃ ca|
ārogyamāpnoti hi so'cireṇa mitrairabhijñairupacaryamāṇaḥ||40||
tadvyādhisaṃjñāṃ kuru duḥkhasatye doṣeṣvapi vyādhinidānasaṃjñām|
ārogyaṃjñāṃ ca nirodhasatye bhaiṣajyasaṃjñāmapi mārgasatye||41||
tasmāt pravṛttiṃparigaccha duḥkhaṃ pravartakānapyavagaccha doṣān|
nivṛttimāgaccha ca tannirodhaṃ nivartakaṃ cāpyavagaccha mārgam||42||
śirasyatho vāsasi saṃpradīpte satyāvabodhāya mativicāryā|
dagdhaṃ jagat satyanayaṃ hyadṛṣṭvā pradahyate saṃprati dhakṣyate ca||43||
yadaiva yaḥ paśyati nāmarūpaṃ kṣayīti taddarśanamasya samyak|
samyak ca nirvedamupaiti paśyan nandīkṣayācca kṣayameti rāgaḥ||44||
tayośca nandīrajasoḥ kṣayeṇa samyagvimuktaṃ pravadāmi cetaḥ|
samyagvimuktirmanasaśca tābhyāṃ na cāsya bhūyaḥ karaṇīyamasti||45||
yathāsvabhāvena hi nāmarūpaṃ taddhetumevāstagamaṃ ca tasya|
vijānataḥ pasyata eva cāhaṃ bravīmi samyak kṣayamāsravāṇām||46||
tasmāt paraṃ saumya vidhāya vīryaṃ śīghraṃ ghaṭasvāstravasaṃkṣayāya|
duḥkhānanityāṃśca nirātmakāṃśca dhātūn viśeṣeṇa parīkṣamāṇaḥ||47||
dhātūn hi ṣaḍ bhūsalilānalādīn sāmānyataḥ svena ca lakṣaṇena|
avaiti yo nānyamavaiti tebhyaḥ so'tyantikaṃ mokṣamavaiti tebhyaḥ||48||
kleśaprahāṇāya ca niścitena kālo'bhyupāyasśca parīkṣitavyaḥ|
yogo'pyakāle hyanupāyataśca bhavatyanarthāya na tadguṇāya||49||
ajātavatsāṃ yadi gāṃ duhīta naivāpnuyāt kṣīramakāladohī|
kāle'pi vā syānna payo labheta mohena śṛṅgād yadi gāṃ duhīta||50||
ārdrācca kāṣṭhājjvalanābhikāmo naiva prayatnādapi vahnimṛcchet|
kāṣṭhācca śuṣkādapi pātanena naivāgnimāpnotyanupāyapūrvam||51||
taddeśakālau vidhivat parīkṣya yogasya mātrāmapi cābhyupāyam|
balābale cātmani saṃpradhārya kāryaḥ prayatno na tu tadviruddhaḥ||52||
pragrāhakaṃ yattu nimittamuktamuddhanyamāne hṛdi tanna sevyam|
evaṃ hi cittaṃ praśama na yāti pravāyunā vahniriveryamāṇaḥ||53||
śamāya yat syānniyataṃ nimittaṃ jātoddhave cetasi tasya kālaḥ|
evaṃ hi cittaṃ praśamaṃ niyacchet pradīpyamāno'gnirivodakena||54||
śamāvahaṃ yanniyataṃ nimittaṃ sevyaṃ na taccetasi līyamāne|
evaṃ hi bhūyo layameti cittamanīryamāṇo'gnirivālpasāraḥ||55||
pragrāhakaṃ yanniyataṃ nimittaṃ layaṃ gate cetasi tasya kālaḥ|
kriyāsamarthaṃ hi manastathā syānmandāyamāno'gnirivendhanena||56||
aupekṣikaṃ nāpi nimittamiṣṭaṃ layaṃ gate cetasi soddhave vā|
evaṃ hi tīvraṃ janayedanarthamupekṣito vyādhirivāturasya||57||
yatsyādupekṣāniyataṃ nimittaṃ sāmyaṃ gate cetasi tasya kālaḥ|
evaṃ hi kṛtyāya bhavetprayogo ratho vidheyāśva iva prayātaḥ||58||
rāgoddhavavyākulite'pi citte maitropasaṃhāravidhirna kāryaḥ|
rāgātmako muhyati maitrayā hi snehaṃ kaphakṣobha ivopayujya||59||
rāgoddhate cetasi dhairyametya niṣevitavyaṃ tvaśubhaṃ nimittam|
rāgātmako hyevamupaiti śarma kaphātmako rūkṣamivopayujya||60||
vyāpādadoṣeṇa manasyudīrṇe na sevitavyaṃ tvaśubhaṃ nimittam|
dveṣātmakasya hyaśubhā vadhāya pittātmanastīkṣṇa ivopacāraḥ||61||
vyāpādadoṣakṣubhite tu citte sevyā svapakṣopanayena maitrī|
dveṣātmano hi praśamāya maitrī pittātmanaḥ śīta ivopacāraḥ||62||
mohānubaddhe manasaḥ pracāre maitrāśubhā vaiva bhavatyayogaḥ|
tābhyāṃ hi saṃmohamupaiti bhūyo vāyvātmako rūkṣamivopanīya||63||
mohātmikāyāṃ manasaḥ pravṛttau sevyastvidampratyayatāvihāraḥ|
mūḍhe manasyeṣa hi śāntimārgo vāyvātmake snigdha ivopacāraḥ||64||
ulkāmukhasthaṃ hi yathā suvarṇaṃ suvarṇakāro dhamatīha kāle|
kāle pariprokṣayate jalena krameṇa kāle samupekṣate ca||65||
dahet suvarṇaṃ hi dhamannakāle jale kṣipan saṃśameyedakāle|
na cāpi samyak paripākamenaṃ nayedakāle samupekṣamāṇaḥ||66||
saṃpragrahasya praśamasya caiva tathaiva kāle samupekṣaṇasya|
samyaṅ nimittaṃ manasā tvavekṣyaṃ nāśo hi yatno'pyanupāyapūrvaḥ||67||
ityevamanyāyanivartanaṃ ca nyāyaṃ ca tasmai sugato babhāṣe|
bhūyaśca tattaccaritaṃ viditvā vitarkahānāya viodhīnuvāca||68||
yathā bhiṣak pittakaphānilānāṃ ya eva kopaṃ samupaiti doṣaḥ|
śamāya tasyaiva vidhiṃ vidhatte vyadhatta doṣeṣu tathaiva buddhaḥ||69||
ekena kalpena sacenna hanyāt svabhyastabhāvādasubhān vitarkān|
tato dvitīyaṃ kramāmarabheta na tveva heyo guṇavān prayogaḥ||70||
anādikālopacitātmakatvād balīyasaḥ kleśagaṇasya caiva|
samyak prayogasya ca duṣkaratvācchettuṃ na śakyāḥ sahasā hi doṣāḥ||71||
aṇvyā yathāṇyā vipulāṇiranyā nirvāhyate tadviduṣā nareṇa|
tadvattadevākuśalaṃ nimittaṃ kṣipennimittāntarasevanena||72||
tathāpyathādhyātmanavagrahatvānnaivopaśāmyedaśubho vitarkaḥ|
heyaḥ sa taddoṣaparīkṣaṇena saśvāpado mārga ivādhvagena||73||
yathā kṣudhārto'pi viśeṣa pṛktaṃ jijīviṣurnecchati bhoktumannam|
tathaiva doṣāvahamityavetya jahāti vidvānaśubhaṃ nimittam||74||
na doṣataḥ paśyati yo hi doṣaṃ kastaṃ tato vārayituṃ samarthaḥ|
guṇaṃ guṇe paśyati yaśca yatra sa vāryamāṇo'pi tataḥ prayāti||75||
vyapatrapante hi kulaprasūtā manaḥpracārairaśubhaiḥ pravṛtaiḥ|
kaṇṭhe manasvīva yuvā vapuṣmānacākṣuṣairaprayatairviṣaktaiḥ||76||
nirdhūyamānāstvatha leśato'pi tiṣṭheyurevākuśalā vitarkāḥ|
kāryāntarairadhyayanakriyādyaiḥ sevyo vidhirvismaraṇāya teṣām||77||
svaptavyamapyeva vicakṣaṇena kāyaklamo vāpi niṣevitavyaḥ|
na tveva saṃcintyamasannimittaṃ yatrāvasaktasya bhavedanarthaḥ||78||
yathā hi bhīto niśi taskarebhyo dvāraṃ priyebhyo'pi na dātumicchet|
prājñastathā saṃharati prayogaṃ samaṃ śubhasyāpyaśubhasya doṣaiḥ||79||
evaṃ prakārairapi yadyupāyairnivāryamāṇā na parāṅmukhāḥ syuḥ|
tato yathāśthūlanivarhaṇena suvarṇadoṣā iva te praheyāḥ||80||
drutaprayāṇaprabhṛtīṃśca tīkṣṇāt kāmaprayogāt parikhidyamānaḥ|
yathā naraḥ saṃśrayate tathaiva prājñena doṣeṣvapi vartitavyam||81||
te cedalabdhapratipakṣabhāvā naivopaśāmyeyurasadvitarkāḥ|
muhūrtamapyaprativadhyamānā gṛhe bhujaṃgā iva nādhivāsyāḥ||82||
dante'pi dantaṃ praṇidhāya kāmaṃ tālvagramutpīḍya ca jivhayāpi|
cittena cittaṃ parigṛhya cāpi kāryaḥ prayatno na tu te'nuvṛttāḥ||83||
kimatra citraṃ yadi vītamoho vanaṃ gataḥ svasthamanā na muhyet|
ākṣipyamāṇo hṛdi tannimittairna kṣobhyate yaḥ sa kṛtī sa dhīraḥ||84||
tadāryasatyādhigamāya pūrvaṃ viṃśodhayānena nayena mārgam|
yātrāgataḥ śatruvinigrahārthaṃ rājeva lakṣmīmajitāṃ jigīṣan||85||
etānyaraṇyānyabhitaḥ śivāni yogānukūlānyajaneritāni|
kāyasya kṛtvā pravivekamātraṃ kleśaprahāṇāya bhajasva mārgam||86||
kauṇḍinyanandakṛmilāniruddhāstiṣyopasenau vimalo'tha rādhaḥ|
bāṣpottarau dhautakimoharājau kātyāyanadravyapilindavatsāḥ||87||
bhaddālibhadrāyaṇasarpadāsasubhūtigodattasujātavatsāḥ|
saṃgrāmajid bhadrajidaśvajicca śroṇaśca śoṇaśca ca koṭikarṇaḥ||88||
kṣemājito nandakanandamātāvupālivāgīśayaśoyaśodāḥ|
mahāvhayo valkalirāṣṭrapālau sudarśanasvāgatamedhikāśca||89||
sa kapphinaḥ kāśyapa auruvilvo mahāmahākāśyapatiṣyanandāḥ|
pūrṇaśca pūrṇaśca sa pūrṇakaśca śonāparāntaśca sa pūrṇa eva||90||
śāradvatīputrasubāhucundāḥ kondeyakāpyabhṛgukuṇṭhadhānāḥ|
saśaivalau revatakauṣṭhilau ca maudgalyagotraśca gavāṃpatiśca||91||
yaṃ vikramaṃ yogavidhāvakurvaṃstameva śīghraṃ vidhivat kuruṣva|
tataḥ padaṃ prāpsyasi tairavāptaṃ sukhāvṛtaistvaṃ niyataṃ yaśaśca||92||
dravyaṃ yathā syat kaṭukaṃ rasena taccopayuktaṃ madhuraṃ vipāke|
tathaiva vīryaṃ kaṭukaṃ śrameṇa tasyārtha siddhyai madhuro vipākaḥ||93||
vīryaṃ paraṃ kāryakṛtau hi mūlaṃ vīryādṛte kācana nāsti siddhiḥ|
udeti vīryādiha sarvasaṃpannirvīryatā cet sakalaśca pāpmā||94||
alabdhasyālābho niyatamupalabdhasya vigama-
stathaivātmāvajñā kṛpaṇamadhikebhyaḥ paribhavaḥ|
tamo nistejastvaṃ śrutiniyamatuṣṭivyuparamo
nṛṇāṃ nirvīryāṇāṃ bhavati vinipātaśca bhavati||95||
nayaṃ śrutvā śakto yadayamabhivṛddhiṃ na labhate
paraṃ dharmaṃ jñātvā yadupari nivāsaṃ na labhate|
gṛhaṃ tyaktvā muktau yadayamupaśāntiṃ na labhate|
nimittaṃ kausīdyaṃ bhavati puruṣasyātra na ripuḥ||96||
anikṣiptotsāho yadi khanati gāṃ vāri labhate|
prasaktaṃ vyāmathnan jvalanamaraṇibhyāṃ janayati|
prayuktā yoge tu dhruvamupalabhante śramaphalaṃ
drutaṃ nityaṃ yāntyo girimapi hi bhindanti saritaḥ||97||
kṛṣṭvā gāṃ paripālya ca śramaśatairaśnoti sasyaśriyaṃ
yatnena pravigāhya sāgarajalaṃ ratnaśriyā krīḍati|
śatrūṇāmavadhūya vīryamiṣubhirbhuṅkte narendraśriyaṃ
tadvīryaṃ kuru śāntaye viniyataṃ vīrye hi sarvarddhayaḥ||98||
saundarananda mahākāvye "āryasatya" nāma ṣoḍaśa sarga samāpta|